HARI LIMA, 23 APRIL 2021
KUCHING: Perintah Sarawak deka nyerenih manah agi sistem meri vaksin COVID-19 dikena mutarka penanggul bepadah ngagai penerima vaksin nya lebih agi sida ke diau ba menua pesisir.
Sapit Kepala Menteri Datuk Amar Douglas Uggah Embas madah, pekara nya deka dipadah ngagai Perintah Besai udah ti beratika penanggul ke nyadi bekenaka sistem Mysejahtera.
“Perintah Sarawak deka mantaika langgur penemu ngagai Perintah Sarawak alai kitai deka ngaga sistem kediri empu.
“Kebuah pia laban kitai bisi penanggul ba arus telekomunikasyen lebih agi di menua pesisir.
“Ambika banding maya Program Imunisasyen COVID-19 Renggat Kedua Sibu empai lama, bisi 72 iku enda ulih digiga tauka ditelefon.
“Nya alai, sistem patut diserenih ngambika sida ti udah ngerejister nama ulih datai nerima vaksin COVID-19 ba maya ke udah diletak,” pia ku iya madah.
Iya bejaku munyi nya maya aum media udah ke ngabas Program Imunisasyen Covid-19 Renggat Kedua di Kuching, kena Hari Lima.
Kelimpah ari nya, iya ti mega Chairman Komiti Penyangga Penusah Nengeri (JBPN) Sarawak madah, Perintah Besai udah besetujuka peminta nengeri tu meli vaksin COVID-19 dikena nembuka Program Imunisasyen Covid-19 ujung bulan Ogos tu.
“Kitai udah berandau enggau Perintah Besai lalu sida ngemendarka peminta kitai meli vaksin COVID-19 ti deka nyadika bekal nyema bisi penanggul ba sida ke nganjung vaksin nya,” ku iya madah baru.
Sitak Sibu udah berengkah ngatur Program Imunisasyen COVID-19 Renggat Kedua kena 19 April tu tadi lalu ditangkan sitak Kuching, Serian, Sri Aman, Betong, Kapit, Mukah enggau Miri belabuh 23 April 2021.
Renggat kedua tu diperambu mujur meri vaksin ngagai 929,435 iku penerima enggau 13 iti Palan Meri Vaksin dikena ba selampur nengeri nyentuk 30 April 2021.-EDISI UKAS
