‘Community Policing’ Meseti Disungkak Mantu Ngemunas Pengelekai COVID-19 – Dr Hazland

HARI SATU, 26 APRIL 2021

KUCHING: Koordinator Komiti Penyangga Penusah Sitak (JPBB) Kuching, Samarahan enggau Lundu, Dr Hazland Abang Hipni madah, kerejasama ari rayat beguna bendar dikena ngemunaska pengelekai COVID-19.

“Komiti Pemansang Enggau Pengelikun Genturung Pendiau (JKKK), Kawasan Rukun Tetangga (KRT), Kawasan Kejiranan Mesra (KJM) enggau RELA patut dichiri nyadi koordinator dikena nyungkakka pengelikun, ngerikod nama orang tama enggau pansut, sereta nentuka Atur Operasyen Standard (SOP) semampai dititihka.

“Kelimpah ari nya, mensia mayuh dipinta bepadah ngagai tuai komuniti enggau polis nyema bisi pengawa enda nitihka SOP kelebih agi sida ti benung dikuarantin.

“Tuai Genturung Pendiau enggau Tuai Raban Bansa (KMKK) mega meseti ngeripot tiap bengkah aktiviti ti dipejalai ba endur sida,” ku iya.

Iya madah munyi nya maya nerangka pekara bekaul enggau pengelekai COVID-19 di Sarawak, kena Hari Satu.

Tu beserimbai enggau kes kena rampit COVID-19 ba nengeri tu agi balat nyadi lalu meri penanggul ngagai rayat Sarawak.

Kelimpah ari nya, Dr Hazland ti mega Kaban Kunsil Nengeri (ADUN) Demak Laut nambahka jaku iya madah, ejensi perintah nyengkaum Opis Pengerai Nengeri, Opis Pemadah Malaysia enggau ejensi ke bukai megai tanggungpengawa meri penerang pemadu baru ti nyadika malin ngagai mensia mayuh.

“Pekara bekaul enggau SOP ti pemadu baru meseti diterangka enggau silik sereta betul lalu beguna bendar ngagai rayat ngambika sida nitihka SOP Atur Mindah Betagang Belebas (PKPB) enggau Atur Mindah Betagang Diteritka (PKPD),” ku iya madah baru.

Nya alai, iya nangkan mensia mayuh sama nyaga diri, diri sebilik enggau orang bukai ari kena rampit virus COVID-19 sereta bejalaika gaya idup baru nitihka SOP ti udah ditetap. –EDISI UKAS

Share
0