Taun Tu Nadai PT3, UPSR Nadai Agi

HARI EMPAT, 29 APRIL 2021

KUALA LUMPUR: Opis Menteri Pelajar Malaysia (KPM) meri pemutus peresa Pentaksiran Tingkatan Tiga (PT3) bagi taun 2021 nadai diatur lalu Ujian Penilaian Sekolah Rendah (UPSR) mega nadai agi berengkah taun tu.

Menteri Kanan Pelajar, Datuk Dr Radzi Jidin madah, pemutus nya digaga beduduk ari penanggul nembiak sekula enggau pengajar tejanggal ba proses belajar enggau ngajar ba sekula.

“Kitai berundingka nembiak sekula maya meri pemutus enda ngatur PT3 bagi taun 2021 bepun ari penanggul proses belajar enggau ngajar sida enggau pengajar ba sekula.

“Kitai mega beratika penanggul pengelekai COVID-19, lalu taja PT3 enda diatur taun tu tang pengawa peresa nembiak sekula mengkang dipejalai,” ku iya bejaku ba Aum Media Khas di Kuala Lumpur, kena Hari Tiga.

Iya madah, atur  peresa ti dikena kenyau taun 2020 iya nya Pentaksiran Bilik Darjah (PBD), Pentaksiran Psikometrik (PPSI) enggau Pentaksiran Aktiviti Jasmani, Sukan Dan Kokurikulum (PAJSK).

Nambahka nya, ku iya, Opis Menteri Pelajar deka ngemanah agi atur nya berengkah taun tu.

Kelimpah ari nya, Peresa Masuk Sekula Khas  (PKSK) deka dikena nembiak sekula sekondari ti deka masuk ‘asrama penuh’ Pom Satu enggau Empat.

“PKSK deka dikena nembiak sekula kelebih agi Pom Empat taun 2022 lalu sida ti deka masuk ‘asrama penuh’ taun 2022, sida ulih ngambi peresa PKSK taun tu,” ku iya. –EDISI UKAS

Share
0