Pemeras Raban Terabai Menua Nagang Pengelekai COVID-19 Begunaka Kerejasama Mensia Mayuh

HARI DUA, 4 MEI 2021

KUCHING: Pemeras raban terabai menua betapi enggau pengelekai pandemik COVID-19 begunaka kerejasama ari mensia mayuh.

Menteri Muda Pekara Korporat Enggau Unit Komunikasi Awam Sarawak (UKAS), Abdullah Saidol madah, mensia mayuh meseti nimbal pemeras nya enggau chara nitihka atur operasyen standard (SOP) ti udah ditetapka perintah.

“Maya kitai irauka Atur Mindah Betagang (PKP) kelimpah atur perintah ke bukai tang sida raban terabai menua gawa ninting hari.

“Tu meseti dikenang kitai.

“Nya alai, dikena nimbal pengeransing sida gawa, kitai anang enda nitihka SOP nagang pengelekai COVID-19 tu,” pia ku iya madah.

Iya bejaku munyi nya maya dirandau ba Program ‘Terima Kasih Frontliners’ Unit Komunikasi Awam Sarawak 2021, kena Hari Satu.

Ba program nya, iya bisi nyuaka pemeri ngagai raban terabai menua ba lima bengkah endur iya nya di Palan Kuarantin Enggau Ngubat Covid-19 Lubah Berampit (PKRC) Kompleks Belia Dan Sukan, Pengawa Ngempang Jalai (SJR) Kampung Sagah, Jalai Sungai Tengah Matang, SJR Kampung Daun, Singai, Pkrc Pusat Latihan Staf Unimas Bau Enggau SJR Jalai Bau-Serikin.

Nambahka jaku iya, Abdullah mega madah, program sehari nya ukai semina ngelai masa sereta beterima kasih ngagai raban terabai menua tang bela ngembuan tuju mai mensia mayuh beterima kasih ngagai pengeransing raban nya gawa.

“Batang kebuah kami UKAS ngatur program sehari tu ukai semina datai nganjungka sida pemeri, berandau enda lama, betanyaka berita tang ngambika bala bukai meda, sida tu meseti dikenang kitai.

“Sida mega deka pulai ke menua, deka nyambut Hari Raya, Gawai Dayak tauka tuju ke bukai.

“Ari kerejasama semua, nitihka SOP, kitai andal pengawa sida ke nyadi terabai menua udah tu ila lempung agi,” ku iya madah baru.

Ba pekara bekaul, program ke sebaka deka diatur baru ungkup terabai menua di Miri kena 5 Mei enggau di Sibu, 6 Mei 2021.

Sama datai nyempulang penatai Abdullah maya tu iya nya Direktor UKAS, Samat Junai sereta bala pegawai UKAS ke bukai.-EDISI UKAS

Share
0