Sekula Di Menua Pesisir Semampai Dikemeratka Perintah

HARI DUA, 4 MEI 2021

KUCHING: Pengelikun enggau pengelantang Sekula Primari di menua pesisir semampai dikemeratka perintah nengeri.

Menteri Pelajar Sains enggau Teknologi Sarawak, Datuk Amar Michael Manyin Jawong madah, pekara tu bepun ari deka nyempilka agi seraka tikas sekula di kandang mengeri enggau menua pesisir.

“Kitai deka ngemeratka pementas ngintu pengelantang enggau pengelikun Sekula Primari ketegal nya nyadi tikas keterubah pelasar ngembing pemansang nembiak sekula,” ku iya.

Iya madah munyi nya maya nerima penemuai basa Exco Gerempung Apai Indai enggau Pengajar (PIBG) Sekolah Menengah Kebangsaan (SMK) Tebakang kena Hari Satu.

Tuju penemuai PIBG nya iya nya berandauka isu pelajar kelebih agi pekara bekaul enggau tikas sekula menua pesisir ke diatu enda tentu engkeman.

Ku iya madah, kelimpah nyendiaka infrastruktur proses ngajar enggau belajar ti nyulut, opis menteri pelajar mega ngemeratka tikas raban pengajar.

Bekaul enggau pengajar interim, Datuk Amar Michael madah, Sarawak agi suntuk urung 3,000 iku pengajar.

Ku iya nambah, penumbuh ‘Centralised School’ ba sitak DUN Tebedu deka terus dipenyadika.

Kelimpah ari nya, iya mega ngelalau raban pengajar ransing bejalaika tanggung pengawa sida ngajar nembiak sekula di menua pesisir. –EDISI UKAS

Share

add comment