Sarawak Nempa Sejarah Numbuh Bank Mindah Kin Kitu Di Menua Pesisir

HARI LIMA, 7 MEI 2021

KUCHING: Perintah Sarawak nempa sejarah enggau pengawa numbuhka servis bank mindah kin-kitu ke diungkup ngagai rayat di menua pesisir.

Kepala Menteri, Datuk Patinggi (Dr) Abang Abdul Rahman Zohari Tun Datuk Abang Openg madah, dikena ngepunka pengawa nya, perintah Sarawak ngungkupka puku RM1.6 juta nyaup bank ke meri servis nya nyengkaum ba perengka pengangkut.

“Nengah bantu Sarawakku Sayang, perintah nengeri bisi nyaup meri puku mimit dikena kitai numbuhka servis bank mindah kin-kitu ke diungkup ngagai rayat di menua pesisir.

“Servis tu deka dipejalaika Bank Simpanan Nasional, Bank Rakyat, Agrobank enggau RHB Bank,” pia ku iya madah.

Iya bejaku munyi nya ba aum media sepengudah bejadika servis bank mindah kin-kitu ba laman Begunan DUN Lama di Kuching, Hari Empat.

Kepala Menteri madah, servis nya dibagi ngagai Bank Simpan Nasional ke deka meri servis di Sebauh enggau Sungai Asap lalu Bank Rakyat di Sebauh, Tatau, Sungai Asap enggau Belaga.

“AgroBank di Padawan, Bau, Lundu, Sematan, Lingga, Pantu, Tebedu, Asajaya enggau Sebuyau lalu RHB Bank di Asajaya, Sadong Jaya, Balingian, Oya enggau Igan,” ku iya nerang.

Iya mega madah, servis nya deka nyaup rayat menua pesisir alai ngelama tu sida bepenanggul nyema bisi pengawa ba bank.

“Aku ngasaika tu chara dikena kitai mutarka penanggul rayat di menua pesisir.

“Aku mega pechaya, bank bisi atur pejalai iya empu ila,” pia ku iya madah baru.

Kelimpah ari nya, iya mega andal servis bank nya lebih agi AgroBank deka mai pengelantang ngagai rayat di menua pesisir ngaduka pengawa betanam betupi.

“Enti kitai berati, servis tu digaga ba menua ke chakah ngereja pengawa betanam betupi.

“Tu deka ngelantangka agi rayat ngemujurka pengawa betanam betupi sida kelimpah bela mai pemaik ngagai dagang temuai.

“Kitai diatu mega benung ngaga jalai besai nebing sungai alai pemansang infrastruktur ba dia bela deka dikemanahka agi,” ku iya madah.

Bela datai maya tu iya nya Sapit Kepala Menteri Tan Sri Datuk Amar Dr James Jemut Masing, Menteri Pemansang Orang Dagang enggau Koperasi Dato Sri Dr Wan Junaidi Tuanku Jafar enggau Sekretari Perintah Nengeri Sarawak Datuk Amar Jaul Samion.-EDISI UKAS

Share
0