Karan 24 Jam, WiFi, Pemansang Udah Datai Ba Rumah Anthony

HARI DUA, 11 Mei 2021

JULAU: Peranak Rumah Anthony Bau di Rantau Tapang, Mujok, Julau diatu udah ngasaika pemansang karan 24 jam ke digaga nengah Skim Karan Alternatif Menua Pesisir Sarawak (SARES).

Sida serumah panjai 22 pintu udah ngena karan ari projek nya kenyau bulan Disember taun siti tadi.

Kaban Kunsil Nengeri (ADUN) Meluan, Rolland Duat Jubin madah, projek nya berupai ngubah tikas pemansang rumah panjai ti jauh di ulu sungai.

“Projek tu digaga enggau ungkus RM60,000 ungkup sepintu bilik.

“Diatu peranak Rumah Anthony ngasaika pemansang ari karan ke digaga nengah SARES,” pia ku iya madah.

Iya bejaku munyi nya maya pengerami nyuaka Projek Ngaga Jematan Tebelian Rumah Anthony Bau ti disuaka Opis Parit Enggau Entali Ai Sarikei ngagai Tuai Rumah Anthony kena Hari Satu tu tadi.

Projek nya digaga nengah Projek Transformasyen Menua Pesisir (RTP) enggau ungkus RM50,000 ke digaga Komiti Pemansang Enggau Pengelikun Genturung Pendiau (JKKK) Rumah Panjai Anthony.

Berebak enggau tu, Rolland Duat madahka iya nemu bisi sekeda bala apai indai nyau besuwaka bilik di mengeri ketegal deka mai anak sida belajar nengah chara on-line.

Ku iya, diatu sida enda ibuh ke pasar agi ngulihka arus internet ketegal udah bisi Wifi ngena VSAT ke digaga Sarawak Multimedia Authority (SMA) tengan bulan March tu tadi.

Ba pekara bekaul, Rumah Anthony sebagi ari 25 buah rumah panjai di Pelilih Julau udah digagaka pemansang SARES.

Kelimpah ari nya, bisi 17 buah projek SMA digaga ba sitak DUN Meluan alai Rumah Anthony mega bela udah nerima projek nya. -EDISI UKAS

Share
0