HARI SATU, 17 MEI 2021

KUCHING: Perintah Sarawak mujur bulih 500,00 dos vaksin COVID-19 ti deka datai di nengeri tu dalam kandang seminggu.

Menteri Muda Pengerai Mensia Mayuh enggau Pengawa Berumah Sarawak, Dr Annuar Rapaee madah, inisiatif perintah nengeri nya bela bulih 500,000 dos agi ke deka datai di nengeri tu nangkan nya ila.

“Nengah inisiatif Perintah Sarawak, nengeri tu deka nerima 500,000 dos vaksin COVID-19 ti deka datai dalam kandang seminggu lebih tu.

“Ukai semina nya, 500,000 dos mega deka datai nangkan ke nya ila,” pia ku iya madah.

Bejaku maya ‘live’ nengah laman Facebook iya kena hari Enam tu tadi, iya madah, pengawa meri vaksin nya bela deka disaup opis luar ke bekaul.

Nambahka jaku iya, Dr Annuar mega madah, tikas ke ulih berampit di Sarawak ulih dikurangka enggau ulah nitih sereta ngasika atur operasyen standard (SOP) kelimpah bela ngambi tuchuk vaksin.

Iya ti mega Kaban Kunsil Nengeri (ADUN) Nangka maya nya madah, 93,801 mensia mayuh di Sibu empai ngerejister nama ngambi tuchuk vaksin COVID-19.

Taja pia ku iya, penyampau nya nyangka mimit ketegal bisi ke ngerejister nengah chara manual dipelabaka nama sida empai dipasukka ba Mysejahtera.-EDISI UKAS