Vaksin Astrazeneca COVID-19 Dikemendar Dikena Di Sarawak

HARI DUA, 18 MEI 2021

KUCHING: Sarawak setuju bekenaka vaksin Astrazeneca COVID-19 nembuka program vaksinasyen di nengeri tu.

Sapit Kepala Menteri Sarawak, Datuk Amar Douglas Uggah Embas madah, pemutus nya bepun ari pansik enggau perati ke digaga raban penyanding penemu vaksin COVID-19 Sarawak (SCOVAG) sebedau tu.

“Udah SCOVAG nerangka pansik, Raban Pengereja Pengawa Imunisasyen Covid-19 (CITF) Sarawak besetuju ngemendarka pengawa ngena vaksin Astrazeneca COVID-19 ba Program Vaksinasyen Covid-19 Sarawak,” pia ku iya nengah penerang media kena Hari Dua.

Chairman Komiti Penyangga Penusah Nengeri Sarawak (JPBNS) nya mega madah, vaksin nya deka dianjung ngagai Sarawak nengah CITF Menua lalu deka diberi ngagai rayat sarawak enggau chara enda bepejal.

Datuk Amar Douglas Uggah bela madah, sebedau tu urung 8,000 iku rayat menua tu nginsil nama sida nerima vaksin, udah ke Perintah Besai madahka deka ngena vaksin nya ba program vaksinasysen.

“Ketegal nya, Perintah Sarawak mutus enda ngena vaksin nya laban nangika program vaksinasysen di nengeri tu tejanggal,” ku iya madah baru.

Tang ku iya, udah vaksin ke sebaka dikena di Selangor enggau Kuala Lumpur, sebengkah media menua tu ngaduka pansik nengah online kena 4 mei 2021 di Sarawak bekaul enggau penemu rayat sentang vaksin Astrazeneca.

Ari pansik nya, 69.4 peratus ari 1,037 orang ke nimbal madah, rayat Sarawak patut diberi peluang milih nerima vaksin nya lalu kebendar iya semina 52.9 peratus ari 1,040 penemu ke diterima deka vaksin nya dikena.

Bepun ari nya, ku Datuk Amar Douglas Uggah, CITF Sarawak besetuju vaksin Astrazeneca COVID-19 dikena ba nengeri tu.-EDISI UKAS

Share

add comment