RM3.66 Juta Dikena Nyaup JPBB Bintulu Napi Pengelekai Pandemik COVID-19

HARI TIGA, 19 MEI 2021

BINTULU: Perintah Sarawak udah ngemendarka agih belanja RM3.66 juta dikena nyaup Komiti Penyangga Penusah Sitak (JPBB) Bintulu betapi enggau pengelekai COVID-19.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, iya mega diterangka JPBB Bintulu bekaul enggau chara sida nagang pengelekai COVID-19 ba sitak nya.

“Ba dua bulan ke udah kitai bela nemu penyampau kes positif ngirauka ati di Bintulu, taja pia raban komiti JPBB udah mujur mutarka penanggul nya.

“Kes positif di Bintulu semina ngerikodka 44 kes aja bepun ari atur SOP ti terit lalu penyampau kes mega nurun,”ku iya madah maya aum media khas COVID-19 di Bintulu, kena Hari Tiga.

Kelimpah ari nya, Kepala Menteri mega minta tuai raban bansa enggau bala tuai rumah matau Atur Operasyen Standard (SOP) ke deka diteritka beserimbai enggau gawai dayak tu ila.

Perintah Sarawak mega ku iya, ngemendarka agih belanja RM5 Juta ngagai Opis Pengerai Bintulu.

Ba aum media ke sebaka, Kepala Menteri madahka perintah Sarawak deka bekenaka chara ‘gazet’ sepital luar dikena ngemujurka agi pengawa meri vaksin lebih agi ungkup rayat di menua pesisir.

Nambahka jaku iya, iya madah, kompeni ti deka meri tuchuk vaksin ngagai pengereja pengawa sida mega tau betanya ngagai sepital dulu.

“Kompeni korporat ti deka meri tuchuk vaksin ngagai pengereja pengawa sida tau betanya ngagai sepital ti udah dikemendar.

“Sepital tu deka meri tuchuk vaksin ngagai pengereja pengawa nyengkaum kompeni industri enggau betanam betupi,”ku iya.

Kelimpah ari nya, perintah Sarawak bela besetuju numbuhka ‘interim building’ sereta nambahka penyampau katil di sepital Bintulu. –EDISI UKAS

Share

add comment