HARI EMPAT, 20 MEI 2021

BINTULU: Perintah Sarawak deka meli 500,000 dos vaksin COVID-19 bansa Sinovac ba renggat keterubah ungkup rayat di nengeri tu.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, tu bepun ari pemendar Menteri Besai Tan Sri Muhyiddin Yassin udah ke betemu sereta berandau empai lama tu tadi.

Ku iya, pemutus meli vaksin nya digaga laban deka ngelengkaska agi program vaksinasyen di Sarawak nyerumba pemeras nengeri tu nagang pengelekai pandemik COVID-19.

“Aku udah betemu enggau Menteri Besai dua minggu sebedau tu lalu Perintah Sarawak udah dikemendar Perintah Besai meli vaksin diri empu. Terima kasih ngagai iya (Menteri Besai).

“Kelimpah ari nya, Perintah Sarawak mega deka meli vaksin baru nangkan ke nya ila,” pia ku iya madah ba aum media udah ke mending penerang bekaul enggau gaya Pandemik COVID-19 di Sitak Bintulu, kena Hari Tiga tu tadi.

Nambahka jaku iya, Kepala Menteri mega madah, Menteri Besai besetuju sepital luar ulih digazet ngambika ulih dikemendarka ngatur pengawa meri tuchuk vaksin COVID-19 ngagai mensia mayuh lebih agi di menua menua pesisir.

“Raban korporat mega ulih betanya ngagai sepital ke udah bisi diberi pemendar lalu sepital tu deka meri vaksin ngagai pengereja pengawa kompeni nya nyengkaum kompeni industri enggau kompeni kebun bedandang besai,” ku iya nerang.-EDISI UKAS