Tujuh Kes COVID-19 VOC Ditemu Di Kuching

HARI LIMA, 21 MEI 2021

KUCHING: Palan Pengerai enggau Pengawa Berubat Komuniti (IKPK) Universiti Malaysia Sarawak (UNIMAS) kena Hari Empat madahka bisi tujuh kes Varian Afrika Selatan (VOC), B.1.351 ditemu di pelilih Kuching.

Nitihka dipadah Tuai Palan Pengerai Enggau Pengawa Berubat UNIMAS, Prof. Dr David Parera nengah penerang media, sida iya mega bisi tetemuka kes V3 P3 di Samarahan enggau Sibu lalu varian B.1.530 tebal agi ditemu nyadi di Miri enggau Kuching.

Ku iya, ari pansik mega tetemuka varian B.1.466.2 (Pasai) majak ngelekai di selampur Sarawak.

Nerang enggau silik, Dr David madah, bepun ari varian SARS-COV-2 udah ditemu bisi di Sarawak, nyentuk ke diatu makmal IKPK majakka pengawa mansik alai 600 sampel enggau penerang disengkaum ba palan penerang SARS-COv-2, global GISAID.

Empai lama tu tadi ku iya, IKPK mega ngaduka pansik tetemuka varian B.1.470 enggau B.1.524 nyadi varian ke ngelekai dalam kandang September ngagai November 2020 lalu varian B.1.470, B.1.524 enggau B.1.466.2 (Pasai) ngelekai berengkah Disember 2020 di Sarawak.

Ketegal nya Dr David minta mensia mayuh semampai nitihka atur operasyen standard (SOP) lebih agi bekenaka sengkabung idung enggau mulut, nyaga pengerai, nyaga takah enggau pangan diri kelimpah ngerejister nama ngambi tuchuk vaksin.-EDISI UKAS

Share
0