Titihka SOP Maya Ngintu Gawai – Datuk John Sikie

HARI SATU, 24 MEI 2021

TATAU: Raban bansa Dayak dilalau nitihka Atur Operasyen Standard (SOP) nyambut pengerami Gawai taun tu baka ti dipadahka Unit Pekara Pengarap Bukai (UNIFOR).

Menteri Muda (Undang-Undang enggau Adat Bumiputera) Sarawak, Datuk John Sikie Tayai madah Gawai Dayak semina dikemendarka disambut enggau diri sebilik aja.

“Kitai enda dikemendarka ngabang ngagai bilik sepiak taja diri serumah diau ba rumah panjai ke sama.

“Enti sida di mengeri, Gawai semina disambut enggau diri sebilik ke diau ba rumah ke sebaka lalu enda ibuh pulai ke rumah panjai,”ku iya madah maya dirandau sepengudah nyuaka chek Projek Mit Menua Pesisir (MRP) di Palan Servis Kunsil Nengeri (DUN) Kakus, kena Hari Enam.

Berebak enggau nya, iya minta semua Chairman enggau raban Komiti Pemansang enggau Pengelikun Genturung Pendiau (JKKK) rumah panjai nentuka peranak rumah panjai nitihka SOP ti udah ditetap.

Bejaku ke pengawa nyuaka chek MRP, Datuk John Sikie ti mega Kaban Kunsil Nengeri (ADUN) Kakus ngarapka sida ti empai nerima chek MRP dipinta nganti dulu.

“Aku ngarapka Gerempung Ukai Dikuasa Perintah (NGO) tauka JKKK ti empai nerima chek MRP nganti dulu alai lebih RM2 juta agih belanja MRP deka diberi ungkup DUN Kakus ba taun 2021.

“Chek tu deka diberi enggau lengkas sepengudah tembu diproses ila lalu ulih dikena JKKK tauka NGO ngaga aktiviti tauka guna ke bukai sida,”pia ku iya.

Bisi lima chek MRP sepenyampau RM85,000 udah disuaka ngagai tiga buah JKKK Rumah Panjai, Komiti Penyangga Penusah Pelilih (JPBD) Tatau enggau Opis Pelajar Pelilih Tatau/Sebauh. – EDISI UKAS

Share

add comment