Timberland Medical Centre Dipilih Nyadi PPV Sepital Peribit

HARI DUA, 25 MEI 2021

KUCHING: Perintah Sarawak udah numbuhka inisiatif nambah Palan Meri Vaksin (PPV) kelimpah nambahka penyampau vaksin ke diberi ngagai rayat nengah sepital peribit.

Sapit Kepala Menteri Sarawak, Datuk Amar Douglas Uggah Embas madah, Timberland Medical Centre nya siti ari sepital peribit ke dipilih nyadi PPV.

“Tu sebagi ari pengeransing perintah nambahka penyampau vaksin ungkup rayat Sarawak.

“Naka ke diatu Sarawak udah ngemendarka 42 ‘General Practitioners’ (GP) ari klinik peribit lalu tujuh ari sepital peribit,” iya madah munyi nya maya dirandau sepengudah ngabas Timberland Medical Centre lalu disempulang Menteri Kaunsil Kandang Menua Enggau Pengawa Berumah, Dato Sri Dr Sim Kui Hian, kena Hari Dua.

Kelimpah ari nya, iya ti mega Chairman Komiti Penyangga Penusah Nengeri (JPBN) Sarawak tepantup ati enggau tusun gawa ba PPV nya alai naka ke diatu urung 200 dos vaksin udah diberi dalam kandang sehari.

“Di Kuching kitai bisi nyauka setengah juta iku rayat ke beumur 18 taun ke atas udah tau nerima vaksin.

“Tu mega sebagi ari penguji kitai deka nentuka semua sida nerima vaksin,” ku iya.

 Berebak enggau nya, Menijar Besai Operasyen Timberland Medical Centre, Lau Kim Lim minta mensia mayuh ke nerima vaksin datai tumu setengah jam maya sida dikangau datai dikena nyeliahka penanggul sekut.

“Aku ngelalau mensia mayuh nitihka atur pengawa ti udah ditetap maya dikangau datai ngambika pengawa meri vaksin mujur dipejalaika,” ku iya madah.–EDISI UKAS

Share
0