Lebih 469,000 Vaksin COVID-19 Deka Datai Di Sarawak

HARI SATU, 7 JUN 2021

KUCHING: Perintah Sarawak deka bekenaka chara ‘hibrid’ ngerejister nama mensia mayuh ba menua pesisir dikena ngelengkaska agi pengawa meri vaksin.

Kepala Menteri, Datuk Patinggi (Dr) Abang Abdul Rahman Zohari Tun Datuk Abang Openg madah, kelimpah ngerejister nama nengah aplikaysen mysejahtera, sarawak mega bekenaka chara manual.

“Taja sida ba menua pesisir nadai ngerejister nama nerima vaksin dalam sistem, kitai tetap meri sida tuchuk vaksin.

“Pengawa ngerejister nama sida deka digaga lalu dirikod sepengudah betuchuk vaksin,” ku iya madah sepengudah ngabas Palan Meri Vaksin Astrazeneca (PPVAZ) di BCCK, kena Hari Satu.

Nambahka jaku iya, Kepala Menteri mega madah, Sarawak deka nerima lebih 469,000 vaksin Sinovac enggau Pfizer BioNTech dalam kandang dua hari ti deka datai.

“Bisi 380,000 dos vaksin Sinovac deka datai di Kuching kena 9 Jun tu lalu 89,360 dos di Miri deka datai kena 10 Jun.

“Kitai ngarapka ulih nerima 1 juta dos bulan Jun tu enggau bulan Julai sereta Ogos.

“Pfizer BioNTech mega deka datai bulan Jun enggau Julai sepenyampau 2 juta dos,” ku iya.

Kelimpah ari nya, Kepala Menteri nesau rayat Sarawak mengkang bejejaga taja udah dituchuk vaksin lalu ngasika Prosedur Operasyen Standard (SOP). –EDISI UKAS

Share
0