HARI TIGA, 9 JUN 2021
KUCHING: Mensia mayuh dilalau enda bekunsika berita ti empai temu pengamat kelimpah tau ngeruga runding orang bukai ba media rama.
Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg meri jaku tangkan nya maya bejakuka pekara bekaul enggau isu ba Sungai Plan Bintulu ti bisi dikunsika mensia mayuh ba media rama.
Iya madah, mensia mayuh dipinta bejimat enggau penerang ba media rama lalu enda numbuhka penyarut lebih agi maya dunya agi betapi enggau pandemik COVID-19 tu.
“Aku minta mensia mayuh mansik dulu penerang ke amat sebedau bekunsi ba media rama,” ku iya madah ba aum media sepengudah bejadika pengerami nyuaka bantu pemakai Sarawakku Sayang BKSS 6.0 di Masjid Darul Ehsan, Kampung Haji Baki Kuching, kena Hari Dua.
Kepala Menteri mega madah, Komiti Penyangga Penusah Sitak (JPBB) Bintulu udah mutarka pekara nya. –EDISI UKAS
