Sarawak Ngembuan Juluk Ati Meri 50,000 Tuchuk Vaksin Dalam Sehari

KHAMIS, 17 JUN 2021

KOTA SAMARAHAN: Sarawak ngembuan juluk ati deka ulih meri 50,000 tuchuk vaksin dalam kandang sehari ba negeri tu.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, naka ke diatu Sarawak ulih meri 45,291 tuchuk vaksin sehari lalu iya andal juluk ati nya mujur dipenyadi enggau penyampau Palan Meri Vaksin (PPV) ditu deka ditambah mayuh agi.

“Nyema kitai nambahka mayuh agi PPV kelimpah nyungkakka agi tikas gawa, aku pechaya juluk ati kitai ulih dipenyadi bulan Ogos tu,” pia ku iya.

Iya bejaku munyi nya maya aum media udah ke ngabas PPV UNIMAS di Kota Samarahan, kena Hari Tiga.

Penatai iya maya tu disempulang Sapit Kepala Menteri Datuk Amar Douglas Uggah Embas, Menteri Perintah Menua Enggau Pengawa Berumah Sarawak, Dato Sri Prof. Dr. Sim Kui Hian enggau Mandal Canselor Unimas, Profesor Datuk Dr Mohamad Kadim Suaidi.

Ba aum media nya, Kepala Menteri mega madah, Sarawak nadai penanggul bulih vaksin alai vaksin ke baru datai 17 Jun lalu dianjung ngagai Miri, Bintulu Enggau Belaga kelimpah 18 Jun datai di Kuching.

Bekaul enggau pejalai iya sehari nya, iya madah, PPV UNIMAS ngembuan perengka guna berubat ke moden kelimpah mayuh raban gawa ti ngelengkaska agi pengawa meri vaksin.

Ku iya, ba dia, 1,000 iku udah datai betuchuk vaksin COVID-19 dalam kandang sehari.

Nangkan ke nya, Datuk Patinggi Abang Zohari ngabas PPV ba Pusat Pakar Perubatan Normah di Kuching.-EDISI UKAS