i-Citra, Ulih Ngemansutka RM5,000 Bepanggai Ba Penyampau Simpan

HARI DUA, 29 JUN 2021

KUCHING: Wang Turu Pengereja Pengawa (KWSP) deka numbuhka i-Citra dikena ngelempungka tating belanja sida ke bisi KWSP ketegal Atur Mindah Betagang (PKP) dipejalaika.

Menteri Besai, Tan Sri Muhyiddin Yassin madah, i-Citra deka nyaup 12.6 juta sida ke bisi KWSP ulih mansutka RM5,000 ke deka dibayar RM1,000 sebulan dalam kandang lima bulan kelimpah bepanggai ba penyampau simpan sida ba KWSP.

“i-Citra dipelabaka ulih ngemansutka RM30 bilion ngagai rayat dikena nyaup ngelempungka tating belanja.

“Sida mega ulih minta mansutka KWSP nengah portal i-Citra ba icitra.kwsp.gov.my berengkah 15 Julai 2021 alai bayar keterubah deka dipelabaka deka dipasukka ngagai akaun bulan Ogos 2021,” ku iya bejaku ba perutusan khas di Kuala Lumpur kena Hari Satu.

Kelimpah ari nya, Menteri Besai mega madahka moratorium automatik dalam timpuh enam bulan mega deka diberi ngagai semua B40, M40 tauka T20 enggau orang dagang mikro alai peminta nya ulih diadu berengkah 7 Julai tu.

“Moratorium tu nadai begunaka atur tauka peminta baka bisi kusut ba penatai, enda ibuh bepadahka nadai kereja agi tauka dokumen bukai,” ku iya madah baru.

Ba pekara vaksinasyen, Program Imunisasyen COVID-19 Menua (PICK) deka disungkak nengah agih belanja RM400 juta dikena nambahka penyampau vaksin ungkup 130 peratus rayat enti disbanding 120 peratus sebedau tu.

Nambahka nya, 29 Palan Meri Vaksin (PPV) deka ditambah baru dikena ngemujurka PPV ‘drive-thru’, ‘mobile’ PPV enggau program ‘Outreach Home-To-Home’ ke diagih belanja RM200 juta.–EDISI UKAS

Share
0

add comment