HARI LIMA, 2 JULAI 2021
KUCHING: Unit Pekara Pengarap Bukai (UNIFOR) berengkah nandu pengawa nyuaka geran ninting taun ngagai raban pengarap ukai Islam di nengeri tu.
Pengawa nyuaka geran tu dipenyadi Sapit Kepala Menteri ke mega menteri megai UNIFOR Datuk Amar Douglas Uggah Embas ba opis iya di Kuching kena Hari Empat.
Maya tu, Kaban Kunsil Nengeri (ADUN) Demak Laut, Dr Hazland Abang Hipni, ngarika Kuching Hockien Association nerima chek RM1.5 juta dikena ngaga Kuil Mazu.
ADUN telian, Yussibnosh Balo mega nyadi pengari komiti Chapel St Anthony di Mukah nerima geran RM2 juta.
Nangkan ke nya, Senator Datuk Paul Igai ngarika Kaban Parlimen Bintulu, Datuk Seri Tiong King Sing, nerima geran RM2 juta dikena ngaga jalai ngelawa pendam Kristin Kuala Setiam di Bintulu.
ADUN Lambir, Ripin Lamat ti diarika pemantu iya, Sahrein Maloh mega nerima geran RM2 juta dikena ngaga Gerija St. Barnabas di Taman Tunku, Miri.
ADUN Senadin, Datuk Lee Kim Shin maya tu diarika Sekretari Pekara Undang-Undang iya, Seng Hoon, nerima geran RM1 juta ungkup New Holy Spirit Chapel di Permyjaya di Miri.
Geran nya diberi ari pemendar Kepala Menteri, Datuk Patinggi Dr Abang Abdul Rahman Zohari Tun Datuk Abang Openg maya nemuai ke Miri sebedau tu.
Bela datai ngemataka pengawa maya tu iya nya Direktor UNIFOR Richard Lon.-EDISI UKAS
