Hari Sarawak Hari Sejarah Ba Rayat Nengeri Tu

HARI EMPAT, 22 JULAI 2021

KUCHING: Hari Sarawak ke disambut kena 22 Julai nyadi hari bulan ke besai reti ngagai rayat Sarawak dikena ngingatka sejarah nengeri diri likun ari pegai Inggeris.

Sapit Kepala Menteri, Datuk Amar Awang Tengah Ali Hasan madah, hari bulan nya ukai semina nyadi siti sejarah ngagai rayat Sarawak tang mega patut diperatika rebak baru ngambika sida nemu semina rayat Sarawak ulih ngaduka kuing dudi hari nengeri sida.

“Maya hari bulan nya, kitai ditukuka bisi perintah kediri empu ari pengeransing ngulihka gelar ‘merdeka’ lalu numbuhka kabinet keterubah Sarawak kena 22 Julai 1963.

“Kabinet keterubah tu betuaika Tan Sri Datuk Amar Stephen Kalong Ningkan ke nyadi Kepala Menteri sereta disempulang bala menteri ari pupu raban bansa ke mega endang peranak asal nengeri Sarawak,” pia ku iya madah beserimbai enggau Hari Sarawak kena Hari Tiga.

Nambahka jaku iya, Datuk Amar Awang Tengah madah, genap iku rayat mega mesti nemu nama bagi penguji ke ditapi dikena bejadika juluk ati nyadi nengeri ke betikas mansang manggai taun 2030.

Ketegal nya ku iya, rayat meseti beserakup dikena nyungkakka agi pemanah ekonomi sereta nempa modal mensia ke bepengelandik mai Sarawak datai ba tikas ke tinggi agi.

“Rayat patut beserakup enda ngira jalai pengarap, bansa enggau chara idup ke bebida dikena nentuka Sarawak majak ngasaika pengelantang ari pengelikun politik sereta mansang enggau likun,” ku iya madah baru. -EDISI UKAS

Share
0

add comment