HARI EMPAT, 22 JULAI 2021
KUCHING: Perintah Sarawak ngena kuasa diri empu bepelasarka konstitusyen ngaga pemutus nitih gaya ke nyadi ba nengeri tu ngambika engkeman agi sereta ngasi dikena napi pengelekai COVID-19.
Kepala Menteri Datuk Patinggi (Dr) Abang Abdul Rahman Zohari Tun Datuk Abang Openg madah, pengulih ngaga pemutus diri empu mandangka peranak nengeri tu nentuka pemujur dudi hari Sarawak bela tikas enggau nengeri tauka menua bukai ke dulu mansang.
Iya madah, Perintah Sarawak bebasaka pemutus ke digaga ba renggat menua tang enda semua pemutus digaga di Putrajaya engkeman dipenyadika di Sarawak.
“Sarawak siti ‘wilayah’ ti nyauka sama pemesai enggau tanah Semenanjung lalu bisi maya, enggau penanggul bekaul ke nyadi, ngujungka enda semua pemutus ke digaga ba renggat perintah besai ulih dikena kitai di Sarawak.
“Tu nyenggala dipeda ba pengawa meri vaksin alai rayat di Sarawak ulih betuchuk dulu, udah nya ngerejista nama ba MySejahtera laban kitai nemu rayat di rumah panjai tauka genturung menua ke jauh bepenanggul ngena MySejahtera.
“Awak ke tau ngasuh kitai ngaga pemutus kediri nitihka gaya Sarawak mega nentuka kitai jampat agi ngaduka pengawa meri vaksin di Sarawak.
“Komiti Penyangga Penusah Nengeri (SDMC) ke disaup sereta disukung bala mayuh lebih agi raban industri udah numbuhka palan meri vaksin ba endur gawa lalu pia mega raban ke meri vaksin mindah bela ditumbuh ngambika ulih ngelawa rayat ke enda dapat ngenataika diri ngagai palan meri vaksin.
“Raban soldadu mega bisi datai nyaup ngemujurka agi pengawa ba menua pesisir,” pia ku iya ba jaku iya beserimbai enggau Hari Sarawak kena hari Tiga.
Kepala Menteri mega madah, enggau semua atur pengawa nya, Sarawak diatu nyadi siti ari nengeri ke pemadu jampat ngaduka program meri vaksin enggau pemujur lebih 60 peratus rayat udah nerima vaksin COVID-19 dos keterubah.
Kelimpah ari nya, iya madah, pengawa diaduka SDMC dikena napi pengelekai COVID-19 nyengkaum ngelengkaska agi program meri vaksin udah mujur ngurangka agi kes berampit ninting hari diatu.
Iya mega madahka diri berasai temegah ati meda kerejasama enggau pementas rayat Sarawak ke bela bisi nyaup sida ke patut dibantu baka ba bantu barang pemakai sekumbang Atur Mindah Betagang (PKP) dipejalaika.
Nambahka jaku iya, iya madah, Perintah Nengeri mega udah numbuhka program bantu barang pemakai nengah BKSS 6.0 kelimpah Perintah Besai nengah PEMULIH, tang taja pia, nyangka bisi bedau nerima bantu nya.
Ba pekara bukai, Kepala Menteri madahka perintah ke dipegai iya diatu ngatur perambu ngaduka pemansang ekonomi enggau strategik ti ngemeratka pemansang infrastruktur nyengkaum ba infrastruktur internet ba tuju mai Sarawak bejadika juluk ati nyadi nengeri mansang manggai taun 2030.
“Aku andal, enggau penemu kitai ti ngembuan timpai runding jauh ke mua, pemansang ekonomi ba nengeri tu ulih mai kitai ngagai tikas ke tinggi agi sereta nyungkakka penatai pemisi rayat.
“Nya alai, pengerami serak tu deka mai reti ke besai agi enggau pengawa bejadika pelin udah COVID-19 ungkup Nengeri Sarawak ke ngembuan tuju nempa kuing ekonomi kitai nyentuk taun 2030 ke mega bela ngira penyadi ketegal COVID-19,” pia ku iya madah baru.
Ba pekara nya, Kepala Menteri ngenataika jaku terima kasih ngagai semua rayat ke bepolitik ti ngemeratka ulah manah lalu nyeliahka penyarut nyadi ba nengeri tu.
Iya mega mai tiap iku rayat Sarawak mengkang besaup sereta bebendar enda ngira ngereja nama-nama pengawa dikena nyungkakka Sarawak nyadi nengeri ke mujur ngagai semua rayat sereta rebak dudi hari.
Iya andal penanggul ke nuntung maya tu enda ngasuh pengingat Peranak Sarawak tusur ngagai sejarah ke nyadi ba nengeri tu. -EDISI UKAS
