Saup Rayat Beguna Nentuka Pemujur Ngelaban COVID-19

HARI EMPAT, 22 JULAI 2021

KUCHING: Saup ari rayat beguna bendar dikena nentuka pemujur ngelaban pengelekai COVID-19.

Taja ukai pengawa ke muntang tang ku Sapit Kepala Menteri Datuk Amar Douglas Uggah Embas, iya pechaya pemujur nya ulih dipenyadi ari kerejasama rayat.

“Pengawa kitai ngelaban pengelekai COVID-19 ukai pengawa ke muntang laban mayuh pekara patut diperatika lebih agi baka ba pekara pengelikun, ekonomi sereta pengelantang rayat.

“Tang ari saup rayat, pengeransing sereta penemu ke begempung ari rayat, kitai nadai penanggul nempa pemujur ngelaban penyakit tu,” pia ku iya madah.

Iya bejaku munyi nya beserimbai enggau Hari Sarawak 2021, kena Hari Tiga.

Kelimpah ari nya, Datuk Amar Douglas Ugggah mega ngenataika jaku terima kasih ngagai raban terabai menua ke udah bebendar bejalaika tanggungpengawa enda ngira pengelelak sereta bebuaika jam ketegal ngira pengelikun enggau pengerai rayat sarawak.

“Ngena awak tu, aku mega meri terima kasih besai ngagai semua raban terabai menua ke udah bebendar gawa enda ngira siang enggau malam laban deka nentuka pengelikun enggau pengerai rayat,” ku iya madah baru.

Iya mega madah, diatu Sarawak benung ransing ngemujurka pengawa meri vaksin ngagai semua rayat.

Ku iya, naka 14 Julai tu tadi Sarawak mujur meri vaksin dos keterubah ngagai 1,559,655 iku tauka 74.8 peratus lalu dos kedua ngagai 768,358 iku. (36.9%).

Maya tu mega, Datuk Amar Douglas Uggai mai rayat mengkang beserakup sereta besaup nempa nengeri tu betikas mansang manggai taun 2030.

“Ari pengawa ngintu Hari Sarawak, rayat deka beratika sejarah enggau pengawa bala pemesai dulu suba nempa penyerakup raban bansa lalu nentuka penegut ekonomi, politik enggau pengawa rama nengeri,” ku iya madah.

Iya madah, 22 Julai nyadi hari bulan sejarah ke patut ditemu tiap iku rayat Sarawak lebih agi ba pekara ke nyadi nyentukka Sarawak diberi kuasa megai diri empu.

“Sida ke ada sebedau taun 1963 nemu bakani gaya Sarawak maya nya enti dibanding enggau diatu.

“Mayuh udah berubah baikka ba pekara ekonomi, rama, fizikal enggau politik,” pia ku iya. -EDISI UKAS

Share
0

add comment