Hari Sarawak Mengkang Nyadi Pelasar Negut Penyerakup, Pengelikun Rayat Nengeri Tu

HARI LIMA, 23 JULAI 2021

KUCHING: Hari Sarawak deka mengkang nyadi pelasar negutka penyerakup, pengelikun enggau ulah bebasaka pangan diri pupu raban bansa enggau enda sama jalai pengarap ba nengeri tu.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, sehari tu udah genap 58 taun peranak Sarawak megai perintah ba nengeri diri empu.

Ku iya, mayuh udah pemujur dipeda tang taja pia agi mayuh mega patut diputarka dikena bejadi juluk ati nempa Sarawak nyadi nengeri mansang lalu rayat deka bepenatai pemisi tinggi.

“Aku andal amat kitai ulih bejadika juluk ati tu ba taun 2030 enti semua kitai bebendar agi nempa ekonomi mansang dalam kandang semilan taun agi nitihka chara kitai empu.

“Aku mega udah bejadika Pelin Udah COVID-19 pagi tadi lalu aku andal amat enggau ulah peranak Sarawak ke dipandangka maya napi COVID-19 deka nyadi pemun ngagai kitai bejadika tuju pelin nya manggai taun 2030,” pia ku iya madah.

Iya bejaku munyi nya maya pengerami ngintu Hari Sarawak 2021 ba Begunan Dewan Undangan Negeri (DUN) ditu, malam hari Empat.

Bela datai maya tu, tiga iku Sapit Kepala Menteri iya nya Datuk Amar Douglas Uggah Embas, Tan Sri Datuk Amar Dr James Jemut Masing enggau Datuk Amar Awang Tengah Ali Hasan, Menteri Perintah Menua enggau Pengawa Berumah Sarawak ke mega menteri ke ngatur pengerami Hari Sarawak 2021, Dato Sri Prof Dr. Sim Kui Hian sereta bala Menteri Kabinet nengeri Sarawak.

Kepala Menteri mega madah, agih belanja ke besai enda nentuka pemujur nyema gaya politik enda likun.

Ku iya, penyarut ke nyadi ba politik sereta ulah amu kuasa deka ngujungka penyarut lalu tau ngeruga pengelikun pemansang ekonomi.

“Enda ngira nama perambu ke digaga perintah, diungkupka agih belanja ke mayuh, tang nya enda pulaika pemujur enti politik enda likun.

“Penyarut ke nyadi ba politik, parti-parti politik bela berebutka kuasa deka ngepunka penusah bukai lalu enda manah ngagai pengelikun pemansang ekonomi. Orang menua bukai endang enggai beranakka puku ba menua tauka nengeri ke enda entap tauka enda likun ba pekara politik,” ku iya madah. -EDISI UKAS

Share
0

add comment