Tikas Imunisasyen Tinggi, Pengelekai COVID-19 Majak Nurun

HARI SATU, 2 OGOS 2021

KUCHING : Opis Pengerai Nengeri Sarawak ba penerang media kena Hari Minggu madahka naka 31 Julai 2021, Sarawak udah nyapai tikas imunisasyen COVID-19 ke pemadu manah alai 86.7 peratus iku nerima dos keterubah lalu 66.6 peratus nerima dos kedua.

Ba penerang media nya mega nerang, dipelabaka lebih 70 peratus ari rayat Sarawak deka nerima imunisasyen COVID-19 manggai ujung bulan Ogos 2021 sepengudah meri timbal ke positif ngagai penyampau kes baru sereta kes nabanka nyawa ketegal COVID-19.

Nangkan ke nya, penyampau kes COVID-19 ba Unit Siru Jaga (ICU) ba sepital udah nyengala nurun bepun ari bungkur imunisasyen COVID-19 di Sarawak majak nambah kenyau bulan Jun 2021.

Berebak enggau nya, mensia mayuh ke empai nerima dos vaksin keterubah tauka empai nerima kangau dipinta ngerejister ngagai Opis Residen, Pelilih, Palan Meri Vaksin (PPV) sereta Klinik Pengerai ke besemak tauka nerima tuchuk vaksin nengah chara ‘walk-in’.

Kelimpah ari nya, mensia mayuh dipinta ngemeranka Atur Operasyen Standard (SOP) ti udah ditetapka perintah sereta nyaga takah enggau pangan diri.–EDISI UKAS