HARI TIGA, 4 OGOS 2021

KUCHING: Aum Kunsil Nengeri (DUN) Sarawak enda ulih diatur sepemanjai timpuh Proklamasi Darurat digaga di Sarawak berengkah 2 Ogos 2021 nyentuk 2 Februari 2022.

Speaker Kunsil Nengeri (DUN) Sarawak, Datuk Amar Mohd Asfia Awang Nassar madah, pekara tu nitihka Seksyen 4 Ordinan Darurat (Kuasa-Kuasa Penting) (Sarawak) 2021.

Iya mega madah, semua elawin raban DUN Sarawak deka terus dibayar nitihka Seksyen 5.

“Dalam kandang darurat dipejalaika, Aum DUN Sarawak mega enda ulih diatur.

“Taja pia, raban DUN agi bisi nerima elawin baka selama nitihka undang-undang,” pia ku iya madah.

Iya bejaku munyi nya ba Aum Media Proklamasi Darurat (Sarawak) enggau Ordinan Darurat (Kuasa-Kuasa Perlu) Sarawak 2021 di Kunsil Nengeri (DUN) Sarawak kena hari Tiga.

Kelimpah ari nya, kuasa eksekutif Kepala Menteri enggau Kaunsil Aum Perintah Nengeri mega deka dipejalaika baka selama nitihka Sekyen 6(1) enggau Seksyen 6(2) ti nentuka sida nerima elawin bepelasarka undang-undang.

Bela datai maya tu, Sapit Speaker DUN Sarawak Dato Gerawat Gala.-EDISI UKAS