Insentif Khas Enggau Elawin Deka Diperunding Ungkup Atlet Para Sarawak Ba Lumba Paralimpik Tokyo 2020

HARI TIGA, 4 OGOS 2021

KUCHING: Perintah Sarawak deka ngungkupka insentif khas ngagai atlet ‘para’ nengeri tu nyema sida mujur mai pulai midul ba Lumba Paralimpik Tokyo 2020 ke deka diatur kena 24 Ogos ngagai 5 September deka datai.

Berita gaga tu dibantaika Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg maya ngenataika jaku khas ngagai lima iku atlet ‘para’ Sarawak ti ngarika Malaysia ba pekit nya nengah aplikasyen zoom ke ditabur terus ba laman Facebook enggau Youtube enggi Unit Komunikasi Awam Sarawak (UKAS), kena Hari Tiga.

Iya madah, iya mega deka berunding meri elawin RM10,000 ngagai tiap iku sida ti nyadika belanja sekumbang ke ngambi bagi ba pekit renggat dunya nya.

“Kitai nyangka ulih nambahka elawin dikena sida bepekit din, nyangka kitai meri RM10,000 ngagai siku-siku.

“Sida ke mujur mai midul ila, kitai deka berandauka pengawa meri insentif khas udah sida pulai,” pia ku iya madah.

Nambahka jaku iya, Kepala Menteri madahka iya andal lima iku atlet nya deka nempa pemujur ba lumba nya ila.

“Aku andal sereta pechaya nengah latih ke chukup, sida ulih nempa pemujur maya bepekit,” ku iya madah.

Atlet ‘para’ Sarawak ke deka besemekih begulai enggau tim Malaysia iya nya dua iku atlet Para Powerlifting iya nya Bonnie Bunyau Gustin enggau Jong Yee Khie.

Kelimpah seduai, dua iku atlet nyemerai iya nya Muhammad Nur Syaiful Zulkafli enggau Jamery Siga (S5/50m kupu-kupu) enggau atlet ‘para’ archery, Wiro Juli.

Sida mega deka diuluka Jurulatih Powerlifting Malaysia, Jamil Adam. -EDISI UKAS