HARI LIMA, 6 OGOS 2021

KAPIT: Sarawak nadai penanggul ngamatka juluk ati bejadi tikas ‘herd immunity’ tengan bulan Ogos tauka Sepember bepun ari pemujur pengawa meri vaksin ba nengeri tu naka ke diatu.

Kepala Menteri, Datuk Patinggi (Dr) Abang  Abdul Rahman Zohari Tun Datuk Abang Openg madah, pekara nya ulih dipenyadi ari saup semua nyengkaum raban soldadu kelimpah timbal ke manah ari rayat.

Bejaku maya ke ngabas Palan Meri Vaksin (PPV) Combat Medic Vaccination Team (CMTV) di genturung pendiau Kenyah enda jauh ari entara Sarawak enggau Kalimatan di Ulu Baleh kena hari Empat, iya mega madahka diri berasai lantang meda pemujur pengawa meri vaksin di Sarawak ke nyulut ari nengeri bukai.

Ngelansa tikas pengawa meri vaksin di sitak Kapit, iya madah, sitak nya udah dulu ari langgur 80 peratus alai udah datai ba tikas 84 peratus ba dos kedua.

“Tu udah chukup manah taja pan menua Kapit tusah dilawa kelimpah genturung pendiau jauh ari pangan diri,” pia ku iya madah.

Program meri vaksin ba genturung pendiau nya diaduka raban soldadu sereta disaup ejensi bukai.

Dulu ari nya, Kepala Menteri mendingka penerang bekaul enggau genturung pendiau nya nyengkaum pekara perengka guna infrastruktur, pekara bekaul enggau peranak menua nya enggau program meri vaksin.

Iya mega ngemendarka agih belanja dikena ngaga jalai semin, gerija enggau balai mensia mayuh ba genturung pendiau dia.

Sama bela datai maya tu iya nya Sapit Kepala Menteri,Tan Sri Datuk Amar Dr. James Jemut Masing, Menteri Perintah Menua enggau Pengawa Berumah Sarawak, Professor Dato Sri Dr. Sim Kui Hian, Sekretari Perintah Nengeri, Datuk Amar Jaul Samion, Kaban Parlimen Ulu Rajang, Datuk Wilson Ugak Kumbong enggau Panglima Medan Timur, Lt.Jen. Dato Mardzuki Muhammad.-EDISI UKAS