Perintah Sarawak Ransing Numbuh Pemansang Menua Pesisir, Ngemeratka Projek Jalai Alun

HARI SATU, 9 OGOS 2021

KAPIT: Perintah Sarawak deka lebih agi ngemeranka pengawa nentuka genturung pendiau di menua pesisir digagaka jalai alun ba Pelin Langgur Pemansang Malaysia Lumpar Ke-12 (RM-12).

Sapit Kepala Menteri Sarawak, Tan Sri Datuk Amar Dr James Jemut Masing madah, jalai alun beguna bendar ngagai pengawa ngaduka pemansang.

“Ba RMK-12, kitai deka ngemeratka pengawa numbuhka pemansang infrastrtuktur lalu tu deka nentuka genturung pendiau enggau rumah panjai di menua pesisir digagaka jalai alun,” pia ku iya maya dirandau udah program begulai enggau komuniti di Kapit, kena Hari Minggu.

Nambahka jaku iya, iya ti mega Kaban Kunsil Nengeri (ADUN) Baleh madah, diatu Kapit ulih dilawa nengah jalai darat udah ke jalai ari Sibu digaga.

“Enti suba, Kapit tu baka siti pulau di Borneo, enda ulih dilawa ngena jalai darat.

“Tang diatu Kapit udah dijantil enggau jalai alun ari Sibu ke Kanowit lalu disambung ngagai Song sebedau datai ditu,” ku iya madah baru.

Jalai alun nya ku iya, deka nyadi pemun pemansang ke lebih agi di Kapit.

Kelimpah ari nya, iya madah, arus penyambung telekomunikasyen ba menua nya mega deka dikemanahka agi.

Dulu ari nya, iya bisi nyuaka geran Projek Mit Menua Pesisir (MRP) RM 1,370,500 Ungkup Renggat 2/2021 ngagai 87 Komiti Pemansang enggau Pengelikun Genturung Pendiau (JKKK), Gerempung enggau Biro Raban Indu ba sitak DUN Baleh. -EDISI UKAS