HARI SATU, 9 OGOS 2021

KUALA LUMPUR: Rayat Perlis, Sarawak enggau Wilayah Persekutuan Labuan ditangkan mengkang bejejaga taja udah bejalaika Renggat 3 Pelin Ngadu Menua (PPN).

Menteri Besai, Tan Sri Muhyiddin Yassin madahka tu bepun ari varian delta jampat agi ngelekai ari varian ke sebedau tu.

Kelimpah ari nya, iya madah, tiga batang pekara meseti dikemeratka maya betapi enggau pandemik.

“Aku semampai ngemeranka ba aum khas Kaunsil Pengelikun Menua (MKN), Kaunsil Ngadu Menua (MPN) enggau aum perintah tiga batang pekara ke patut diperatika maya betapi enggau pandemik iya nya keterubah pengerai enggau pengelikun rayat lalu kedua iya nya ekonomi rayat sereta pekara dagang.

“Pekara ti ketiga iya nya pengelikun rayat nyengkaum ‘sosial norm’ kelimpah pengerai runding enggau emosi rayat,” iya bejaku munyi nya ba jaku khas kena Hari Minggu.

Nambahka jaku iya, Tan Sri Muhyiddin madah, perintah udah besaup enggau raban peribit sereta gerempung ukai dikuasa perintah dikena nentuka pengawa meri vaksin diberi enggau lengkas nengah chara ‘whole of nation’.

Kelimpah ari nya, iya madah, keterubah suba, rayat agi kakang enggau pengulih perintah ngaduka pengawa meri vaksin, tang ari saup semua, taja betapi enggau mayuh penanggul, menua tu mujur bejalaika pengawa nentuka vaksin ungkup rayat semampai bisi. –EDISI UKAS