Perintah GPS Sigi Enda Nyerah Alah, KM Minta Kerejasama Rayat

HARI DUA, 17 OGOS 2021

KUCHING: Perintah Gabungan Parti Sarawak (GPS) sigi enda nyerah alah tauka mantul ngapa berundingka chara dikena nagang pengelekai COVID-19 ba nengeri tu.

Nya alai, Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg nesau rayat terus bejalaika pengawa enggau ati lurus sereta bebendar mutarka pandemik tu.

“Tu ukai maya iya nanyaka nama utai ulih kitai tang tiap iku rayat meseti ransing bejalaika pengawa dikena nagang pandemik ke benung nyadi ba menua kitai.

“Aku meri terima kasih ngagai raban terabai menua ba selampur nengeri tu ke udah bendar bejalaika tanggungpengawa diri nentuka kitai likun ari kena rampit COVID-19,” ku iya madah munyi nya maya bejadika pengerami Bulan Kebangsaan enggau Kibar Jalur Gemilang 2021 Renggat Nengeri Sarawak di Dewan Undangan Negeri, kena Hari Satu.

Kepala Menteri nambahka jaku iya, ku iya, rayat Sarawak chukup betuah udah bulih bantu ari perintah nengeri enggau perintah besai dikena ngelempungka tating belanja sida maya betapi enggau COVID-19.

Iya madahka perintah GPS mega beratika guna dudi hari dikena nentuka ekonomi nengeri Sarawak ulih nyapai juluk ati nengeri mansang manggai taun 2030.

“Perintah nengeri udah ngatur strategi ngemanahka ekonomi nengah ‘Post COVID-19 Development Strategy 2030 (PCDS 2030) dikena nyungkakka ekonomi Sarawak ari RM136 bilion ba taun 2019 ngagai RM282 bilion ba 2030,” ku iya nerang baru. –EDISI UKAS