HARI TIGA, 1 SEPTEMBER 2021

KUCHING : Rambai jaku ‘Malaysia Prihatin’ enggau ‘Malaysia Menang Bersama’ engkeman mandangka pekara ke nyadi maya pandemik COVID-19.

Menteri Dagang Temuai, Seni Enggau Main Asal, Datuk Abdul Karim Rahman Hamzah madah, nya mega engkeman dikena mantaika nama pengawa ke udah digaga perintah Sarawak nyaup rayat betapi enggau pandemik COVID-19.

“Pengeransing enggau penyiru perintah nengeri nyaga pengerai sereta pengelikun rayat ari dirampit virus COVID-19 ulih dipeda nengah penumbuh 343 Palan Meri Vaksin (PPV) di selampur Sarawak.

“Terima kasih ngagai kerejasama entara perintah Sarawak enggau perintah besai ngemujurka pengawa tu,” ku iya.

Datuk Abdul Karim mega madahka perintah Sarawak udah numbuhka tujuh pakej Bantu Khas Sarawakku Sayang (BKSS) nyengkaum BKSS 7.0 ke beungkus RM800 juta baka ti udah dipadahka perintah 4 Ogos tu tadi.

Iya madah, bantu tu dikena nyungkakka pengawa bedagang kelimpah ngelempungka tating belanja rayat maya betapi enggau pandemik COVID-19. –EDISI UKAS