HARI EMPAT, 2 SEPTEMBER 2021
BINTULU: Sekretari Perintah Nengeri Sarawak, Datuk Amar Jaul Samion udah ngabas taba projek Jematan Batang Kemena, Sebauh, kena hari Tiga.
Maya nya iya diterang Kontraktor Juara Beetuah Sdn. Bhd. bekaul enggau pejalai projek nya.
Projek Jematan Batang Kemena tu bisi bepenanggul laun ketegal gaya hari, isu tanah kelimpah Atur Mindah Betagang (PKP).
Projek nya bekenaka belanja RM89,779,694.48 lalu disadang tembu Disember 2022.
Kelimpah ari nya, Datuk Amar Jaul mega bisi ngabas projek Jematan Bintulu-Jepak.
Projek tu berengkah digaga 3 April 2019 enggau ungkus RM466,679,497 lalu dipelabaka tembu bulan April 2023.
Projek nya mega bisi napi penanggul laun ketegal PKP kelimpah atur operasyen standard (SOP) ke udah ditetapka perintah ketegal pandemik COVID-19.
Datuk Amar Jaul ngarapka kontriktor projek nembuka projek nitihka timpuh sereta langgur projek.
Penembu jematan tu deka nyantilka jalai ngelawa palan industri baka Metadeng Industrial Park enggau Mukah Smart City sereta nyadi pemun pengawa beranakka puku ba 150,000 mensia mayuh di Tanjung Kidurong enggau Taman Perindustrian Samalaju.
Bela datai Direktor Unit Pemantauan Pelaksanaan Negeri (UPPN) Azmi Bujang, Residen Sitak Bintulu Jack Aman Luat, Pegawai Pelilih Bintulu Muhammad Dino Amid, Pegawai Pelilih Sebauh William Manggoi enggau Pegawai Pelilih Tatau Calvin Ligong. -EDISI UKAS
