HARI TIGA, 8 SEPTEMBER 2021
KUCHING: Perintah Sarawak semampai chakah nyaup orang dagang betapi enggau pandemik COVID-19 ba nengeri tu.
Sapit Kepala Menteri Sarawak, Datuk Amar Awang Tengah Ali Hasan madah, perintah nengeri udah numbuhka bantu nengah Pakej Bantu Khas Sarawakku Sayang (BKSS) 1.0 nyentuk BKSS 7.0 sepenyampau RM5.3 bilion dikena ngelempungka tating belanja rayat nyengkaum orang bedagang.
Menteri Dagang Entarabansa Enggau Industri, Penyangkai Industri enggau Pemansang Orang Dagang nya mega madahka mayuh bengkah program bantu ditumbuhka opis menteri iya baka Skim Kredit Mikro Sarawak (SKMS).
“Kami udah meri pemendar SKMS ungkup orang dagang B40, mikro enggau mit sepenyampau RM100 juta alai RM50 juta udah diberi nengah opis menteri tu lalu laluh iya deka diberi enggau chara berenggat.
“Naka ke diatu, semua 1,463 iku ke udah minta jali ari SKMS bulih subsidi dalam timpuh tiga taun setengah tauka 42 bulan.
“Pia mega, peminta ke baru ke udah dikemendarka naka 31 Disember 2021 ulih nerima bantu subsidi sepengelama 42 bulan,” ku iya madah ba aum media pekara bekaul enggau BKSS ungkup orang dagang Sarawak di Wisma Sumber Alam, kena Hari Dua.
Nambahka jaku iya, Datuk Amar Awang Tengah madah, Skim Duit Jali Industri Mit Enggau Jelan Pemesai (SPIKS) ungkup Dagang Mit Enggau Jelan Pemesai (PKS) Bumiputera sepenyampau RM20 juta agi deka diberi enggau chara berenggat lalu naka ke diatu bisi 411 peminta udah dikemendar ke beungkus RM30.13 juta.
Kelimpah ari nya, perintah nengeri mega numbuhka bantu baka Program Graduan Ke Arah Keusahawanan (GERAK), Usahawan Teknikal dan Vokasional (USTEV), Kemudahan Bantuan Khas (SRF), Kemudahan Bantuan dan Pemulihan Bersasar (TRRF), enggau Pembiayaan Pelancongan (PTF).
Ku iya, opis menteri iya deka semampai mansik enggau silik inisiatif BKSS ke engkeman lalu ngarapka bantu ari perintah Sarawak ulih ngelempungka tating belanja rayat kelimpah orang dagang maya betapi enggau pandemik COVID-19 tu.
Bela datai iya nya Menteri Muda MINTRED, Datuk Mohd Naroden Majais enggau Sekretari Mendam MINTRED, Datu Liaw Soon Eng.-EDISI UKAS
