HARI TIGA, 8 SEPTEMBER 2021
KUCHING: Sarawak nyadi nengeri keterubah di Malaysia ngatur program vaksinasyen ungkup nembiak ke beumur 16 ngagai 17 taun.
Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, program vaksinasyen tu diatur ba enam pelilih menua iya nya Kuching, Sri Aman, Serian, Sarikei, Sibu enggau Bintulu.
“Seharitu (Hari Tiga) kitai di Sarawak berengkah ngatur program meri vaksin ngagai sida ke beumur 16 ngagai 17 taun ti mega program vaksinasyen keterubah di Malaysia.
“Program vaksinasyen tu diatur ba pelilih Kuching, Sri Aman, Serian, Sarikei, Sibu enggau Bintulu,” ku iya madah ba aum media udah bejadika Majlis Pelancaran Vaksinasi Untuk Remaja Berumur Bawah 18 Tahun di Klinik Kesihatan Kampung Telaga Air, kena Hari Tiga.
Ku Kepala Menteri nambahka jaku iya, ku iya, Sarawak deka berengkah meri vaksin ngagai nembiak ke beumur 16 ngagai 17 taun kelimpah nembiak beumur 12 ngagai 15 taun berengkah 8 September tu nengah chara berenggat ba Palan Meri Vaksin (PPV), sekula enggau klinik pengerai.
Iya madahka ba menua pesisir program vaksinasyen deka diatur nengah program ‘outreach’ ngelawa sekula lalu meri tuchuk vaksin ngagai nembiak beumur 12 ngagai 17 taun ba pelilih Kapit ti nyengkaum 16 buah sekula enggau 9,334 iku nembiak alai di Miri nyengkaum dua buah sekula enggau 207 iku nembiak.
Datuk Patinggi Abang Zohari mega madah, naka 7 September 2021, Sarawak udah mujur 89 peratus iku orang betuchuk dua dos vaksin alai penyampau semua rayat Sarawak udah betuchuk vaksin diatu manggai ngagai 65.2 peratus. –EDISI UKAS
