HARI EMPAT, 9 SEPTEMBER 2021
SIBU: Program vaksinasyen enggau cara ‘mopping’ deka dipejalaika ungkup bala nembiak sekula di sibu ke enda ulih ngenataika diri betuchuk vaksin ba Palan Meri Vaksin (PPV) baka ke udah ditetapka.
Menteri Muda Pelajar, Sains Enggau Pansik Teknologi, Dr Annuar Rapaee madah, sida mega deka ngatur program begulai enggau pengajar dikena meri kaunseling ngagai nembiak sekula ke enggai betuchuk vaksin.
“Kitai mesti nemu nama kebuah sida enda datai. Nyangka bisi penanggul ba perengka pengangkut tauka penusah bukai. Taja pia, kita mega deka ngatur chara ‘mopping’ kelimpah sida ulih betuchuk enggau chara ‘walk-in’ nangkan ke tu ila.
“Sida ke enggau betuchuk vaksin, kitai deka ngatur program begulai enggau pengajar ngaga kaunseling di sekula nyengkaum ngagai bala apai indai,” ku iya madah ngagai media udah ke ngabas Program Imunisasyen COVID-19 Menua (Pick) ngagai nembiak 16 ngagai 17 taun di PPV Dewan Suarah Sibu, kena Hari Tiga.
Ba program sehari nya, bisi 1,625 iku nembiak ari SMK St Elizabeth, SMK Sacred Heart, SMK Bukit Lima enggau SMK Methodist betuchuk vaksin Pfizer-BioNTech.
Pengari ari SMK Sacred Heart Sibu, Pengajar Dew Ka Yee maya dirandau meri jaku terima kasih ngagai perintah nengeri ke udah numbuhka program vaksinasyen ungkup nembiak sekula.
Iya madah, program nya beguna bendar dikena nyikap bala nembiak sebedau sekula dibuka baru bulan Oktober ti deka datai.
Ba pekara bekaul, sitak sibu bisi 9,289 iku nembiak ke beumur 16 ngagai 17 taun ari 33 buah sekula betuchuk vaksin ba PPV Dewan Suarah Sibu, PPV Dewan Serbaguna Sibu Jaya enggau PPV Dewan Opis Pelilih Kanowit. -EDISI UKAS
