HARI EMPAT, 9 SEPTEMBER 2021

BETONG: Pengawa Sapit Kepala Menteri Datuk Amar Douglas Uggah Embas nyaup peranak rumah panjai di Dun Bukit Saban ti benung bejalaika Atur Mindah Betagang Diteritka (PKPD) diteruska.

Kena Hari Tiga, iya ke mega Adun Bukit Saban nganjung bantu barang pemakai nengah opis servis iya ngagai 133 pintu ari empat buah rumah panjai ba menua nya.

Rumah panjai ke nerima bantu tu iya nya Rumah Langan Arah di Mara, Layar (20 Pintu), Rh. Joseph Sanda, Jambu Kerampak, Layar (37 pintu), Rh. Bawie Entinggi, Rapong, Rimbas, Debak (53 pintu) enggau Rh. Denil Ranti, Menyalin Baru, Rimbas, Debak (23 Pintu).

Bantu nya dikena nambahka bantu ari Komiti Penyangga Penusah Sitak Betong ke diberi nengah Opis Pengintu Pengelikun Mensia Mayuh Betong.

Bala tuai rumah ke dirandau bela ngenataika jaku gaga sereta beterima kasih ngagai pementas Datuk Amar Douglas ke datai meri bantu maya sida bejalaika atur PKPD. -EDISI UKAS