HARI SATU, 13 SEPTEMBER 2021
PULAU BRUIT: Pemansang enggau pengelantang rayat ba sitak Dun semop semampai dikemeranka pengari rayat dia, Abdullah Saidol.
Iya ke mega Menteri Muda Pekara Korporat enggau UKAS maya nemuai bejalaika pengawa dua hari, sekali agi mai agih belanja alai ke sekali tu iya meri Projek Mit Menua Pesisir (MRP) sepenyampau RM348,620.
Maya dirandau ba hari kepenudi program nya kemari, iya madah, agih belanja nya tebal agi dikena ngadu sereta ngaga perengka guna peranak genturung pendiau menua nya.
“Program serak tu diadukan ba tujuh bengkah endur alai nyuaka MRP sepengampau RM348,620.
“Agih belanja tu disuaka ngagai Gerempung Apai Indai enggau Pengajar (PIBG), tiga Komiti Pemansang enggau Pengelikun Genturung Pendiau (JKKK) rumah panjai enggau empat JKKK genturung menua.
“Agih MRP tu deka dikena ngaduka perengka guna baka pendai, jalai enggau palan engkah kerita,” pia ku iya madah.
Sekeda ari penerima MRP tu iya nya PIBG SK Mohd Redeh, Saai (RM6,000), PIBG SK Tekajong (RM1,000), Kampung Masjid Tekajong (RM88,000), Kampung Penibong (RM3,420), Kampung Sedo (RM90,000),Rumah Sulong (RM15,000), Rumah Atat (RM38,000), Rumah Gawai (RM24,000) enggau Komiti Panel Klinik Pengerai Betanak (RM81,000).
Penatai iya serak tu mega bisi nyuaka pemeri RM5,000 ari SACOFA ngagai Komiti Masjid Al Amin, Kampung Semop.
Nangkan ke nya, maya dipinta ngelansa penyampau kes positif majak nambah, Abdullah madah, mensia mayuh mesti nyaga ulah diri sereta semampai ngasika tangkan ari opis bekaul.
Ku iya, ba renggat ‘endemik’ ila, tiap iku mensia mayuh enda ulih enda bekerejasama sereta enda ngira diri empu aja.
“Maya kitai udah datai ba renggat ‘endemik’ ila, taja pan mayuh udah betuchuk vaksin tang kitai mesti nyaga ulah sereta ngasika semua jaku tangkan ari opis bekaul.
“Pengidup kitai, kereja kitai mesti diteruska,” ku iya madah.
Abdullah pechaya, virus COVID-19 nyangka enda ulih dipunaska lengis dalam kandang beberapa taun tu baka nyamuk aedes ke tusah deka dipunas dikena nyeliah penyakit denggi.
Nambahka jaku iya, penyampau kes positif COVID-19 ke majak nambah nya enda bangat ngirauka iya enggau pengereja pengawa Palan Servis mensia mayuh iya ketegal ke udah betuchuk dua dos vaksin.
Tang taja pia, iya madah, sida semampai ngemeran sereta ngasika SOP baka ke udah ditetapka. -EDISI UKAS
