JPBNS Enda Ngemendarka Peminta Tama Ke Sarawak Ketegal Dokumen Salah

HARI DUA, 14 SEPTEMBER 2021

KUCHING: Komiti Penyangga Penusah Nengeri Sarawak (JPBNS) udah ngaduka pansik bekaul engggau siti peminta tama ke Sarawak ari Semenanjung Malaysia enda dikemendar empai lama tu tadi.

Pekara nya udah diayanka ba laman rama ti madahka JPBNS bisi empat kali enda ngemendarka peminta tama ke nengeri Sarawak.

JPBNS nengah penerang sehari tu tadi madah, peminta nya enda dikemendarka ketegal enda disempulang enggau dokumen ke patut dikena nyukung peminta nya.

Ari pansik mega, orang ke minta nya bisi nyempulang peminta iya enggau pemutus peresa RTK-Antigen ke sebaka ba semua empat iti pom peminta nya.

Nitihka atur operasyen standard (SOP) tama ke Sarawak, tiap iti peminta mesti disempulang enggau peresa RT-PCR baka ke udah ditetapka.

Siti ari atur nya mesti bisi pemutus peresa RT-PCR dalam kandang 72 jam sebedau tama ke nengeri tu.

JPBNS mega madahka orang ke minta nya mega udah ditemu sapa.

Iya nganjung pom peminta tama ke Sarawak kena 8, 9, 10 enggau 11 September 2021 ti disempulang enggau pemutus peresa RTK ke sebaka lalu nya enda nitihka SOP tama ke Sarawak baka ke ditetapka JPBNS.

JPBNS mega udah bisi penerang nyengkaum rikod jaku orang ke nganjung peminta nya kelimpah iya mega ngaku penyalah diri.

JPBNS madahka diri berasai enda lantang ati enggau ulah nya ti sengaja nyalah penerang SOP kelimpah ngasuh nama JPBNS enda manah sereta ngasuh orang bukai saru ketegal madahka empat iti peminta iya enda dikemendarka.

Berindik ari nya, JPBNS ngelalau mensia mayuh semampai nitihka atur baka ke udah ditetapka ba SOP tama ke Sarawak lalu enda nyalahka JPBNS enti sida empu salah.-EDISI UKAS

Share
0

add comment