Nembiak GETS 4.0 Disikap Enggau Pengelandik, Seririh Enggau PCDS 2030

HARI TIGA, 15 SEPTEMBER 2021

KUCHING: Sekretari Perintah Nengeri Sarawak, Datuk Amar Jaul Samion andal tiap iku nembiak enggau graduate deka disikap enggau pengelandik ke lebih manah ti deka nentuka sida bulih kereja begaji besai nyerumba tuju Ngatur Pemansang Udah COVID-19 Sarawak (PCDS) 2030.

Ba Pengerami Bejadika GETS 4.0 nengah aplikasyen Zoom ke dipenyadi Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg, kena Hari Tiga, Datuk Amar Jaul Samion madah, nengah PCDS 2030, beberapa bengkah latih ba GETS 4.0 deka diseririh enggau sektor ekonomi strategik PCDS 2030.

“Kelimpah ari nya, program tu semampai bulih peminta ari ejensi ba timpuh tiga tahun tu tadi.

“Kami udah nerima lebih 5,000 peminta ari graduate ke bisi bekaul enggau STEM nyengkaum ukai STEM di selampur Sarawak,” ku iya.

Datuk Amar Jaul Samion mega madah, mayuh agi awak gawa diungkupka ngagai bala graduate ba taun 2021/2022 lalu mutarka penanggul raban sida ke bedau bulih pengawa. –EDISI UKAS