HARI TIGA, 15 SEPTEMBER 2021
KUCHING: Perintah Sarawak udah ngemendarka geran enggau jali sepenyampau RM28.6 juta ngagai orang betanam betupi di nengeri tu kenyau ari taun 2017.
Sapit Kepala Menteri Datuk Amar Douglas Uggah Embas madah, agih belanja nya diberi enggau chara berenggat.
“Agih belanja tu mega diberi nitihka pemesai enggau pejalai pemansang pengawa betanam betupi,” pia ku iya madah maya ke nemuai ngagai Antares Venture Sendirian Berhad di Jalai Batu Kitang, kena Hari Dua.
Maya nya mega iya ngemataka pengawa nyain sempekat Antares Ventures Sdn Bhd Enggau Carus Greenwealth Sdn Bhd ba tuju pemansang umai bedandang besai.
Datuk Amar Douglas Uggah mega madah, perintah nengeri bela nambahka RM100 juta agi ba AFF dikena ngemansangka sektor betanam betupi moden di nengeri tu.
Iya madah, sektor nya majak deka disungkakka agi enggau teknologi moden ti mega nyadi chara matak rebak baru bela ngambi bagi ba pengawa nya.
Berebak enggau nya, Datuk Amar Douglas Uggah ke mega Menteri Betanam Betupi Moden, Tanah Adat Enggau Pemansang Kandang Menua madahka diri andal singapura deka nyadi pelasar pemansang nyual asil bekebun sarawak ngagai menua bukai.
Ku iya, pekara nya deka dikemujurka agi enggau penumbuh Opis Dagang Temuai Enggau Dagang Sarawak, Singapura (STATOS). -EDISI UKAS
