HARI DUA, 28 SEPTEMBER 2021

SIBU: Siti agi Sepital Medan deka ditumbuh lalu dipejalaika Raban Soldadu Malaysia (ATM) di Sibu, enda lama agi.

Menteri Muda Pekara Pelajar, Sains enggau Pansik Teknologi ke mega Kaban Kunsil Nengeri (ADUN) Nangka, Dr Annuar Rapaee madah, sepital nya digaga di Sepital Sibu ngambika muntang agi bekenaka perengka guna dia.

“Kitai udah berandau enggau ATM sentang pekara tu lalu sida mega udah ngabas endur nya.

“Sepital tu ukai diungkupka ngagai sida ke sakit COVID-19.

“Kebuah kitai numbuhka sepital tu ngambika katil bukai ba Sepital Sibu ulih dikena pesakit COVID-19,” pia ku iya madah ngagai media udah ke ngabas Program Imunisasyen COVID-19 Menua Raban Nembiak 12-15 Taun ba Dewan Suarah Sibu, kena Hari Satu.

Dr Annuar madah, Sepital Medan Sibu dipelabaka deka dibuka dalam kandang dua minggu agi lalu ulih dikena 100 iku pesakit.

Berebak enggau nya, iya ke mega Menteri Muda Pengawa Berumah enggau Pengerai Mensia Mayuh Sarawak madah, modular Unit Siru Jaga (ICU) di Sepital Sibu disadang tembu 5 Oktober tu.

Ba program sehari nya, 1,310 nembiak Sekula Sekondri Sacred Heart enggau Sekula Sekondri Elizebeth datai betuchuk vaksin. -EDISI UKAS