HARI SATU, 4 OKTOBER 2021
MIRI: Perintah Sarawak naka alah ngemujurka Program Nyukat Tanah Adat Bumiputera (NCR).
Sapit Kepala Menteri, Datuk Amar Awang Tengah Ali Hasan madah, pemayuh tanah NCR ke udah disukat nengah program nyukat baru udah nambah mayuh kenyau ari taun 2010 nyentuk ke diatu enti dibanding enggau pengawa nyukat chara lama.
“Ari taun 2010 nyentuk ke diatu, Opis Tanah Enggau Survei Sarawak udah mujur disukat kelinggi urung 999,853 hektar tauka 2.47 juta ekar.
“Ari penyampau nya, 776,226 hektar tauka 1.9 juta ekar udah digazet,” pia ku iya madah.
Datuk Amar Awang Tengah mantaika pekara nya maya aum media udah ke nyua Surat Pala Tanah Seksyen 18 Kanun Tanah Nengeri ungkup Kampung Nusah & Kampung Sebalik Tiris, Bekenu, kena Hari Minggu.
Iya ke mega Menteri Pemansang Kandang Mengeri Enggau Pengeraja Asal II bisi minta Opis Tanah Enggau Servei Sarawak (JTS) chakah agi bejalaika program nyukat tanah NCR chara baru ba semua pelilih di selampur Sarawak.
Bekaul enggau program sehari nya, iya madahka Perintah Sarawak nyuaka Pala Tanah Seksyen 18 Kanun Tanah Nengeri Kampung Nusah Ulu Satap enggau Kampung Sebalik Tiris ngagai 50 iku penerima ti dikena ngelai program nya.
Urung 362 pala tanah deka disuaka ngagai 165 penerima nangkan ke nya.
Peranak Kampung Nusah, Liha Dahan enggau Khaidir Samad maya dirandau meri jaku terima kasih ngagai Perintah Sarawak enggau JTS ke udah nyuaka surat pala tanah sida.
Bela datai, Menteri Muda Orang Indu, Ruang Bilik Enggau Pemansang Nembiak Mit ke mega ADUN Bekenu, Datuk Rosey Yunus, ADUN Lambir, Ripin Lamat, Residen Pelilih Miri, Abdul Aziz Yusuf, Penolong Direktor (Tanah), Opis Tanah & Survei Pelilih Miri, Unus Tambi enggau ke bukai.-EDISI UKAS
