HARI SATU, 4 OKTOBER 2021
SARIKEI: Dua buah rumah panjai di Sare ditu nerima bantu barang pemakai ari Menteri Muda Pengatur Mengeri, Tanah enggau Rampa Menua ti mega ADUN Kuala Rajang, Datu Len Talif Salleh.
Pemeri nya dianjung Palan Servis DUN Kuala Rajang ngagai peranak Rumah Gerinching Chak (21 pintu) enggau Rumah Buni Bujau (22 pintu), kena Hari Minggu.
Dua buah rumah panjai tu benung bejalaika Atur Mindah Betagang Diteritka (PKPD) berengkah 29 September nyentuk 8 Oktober 2021.
Datu Len ngarapka pemeri nya ulih ngelempungka mimit penanggul ke benung ditapi peranak rumah panjai nya.
Iya mega bela ngelalau bala tuai rumah semampai nentuka pengelikun peranak sida ngambika ulih nagang pengelekai COVID-19. -EDISI UKAS
