HARI TIGA, 6 OKTOBER 2021
MIRI: Woksop Pengawa Nyediaka Projek Transformasyen Menua Pesisir (RTP) ungkup taun 2022 renggat pelilih Limbang nyadi pelasar ejensi ngaga projek ngiga chara mutarka isu ke nyadi ba pengawa ngaga RTP ngelama tu.
Kaban Kunsil Nengeri (ADUN) Batu Danau, Paulus Palu Gumbang madah, woksop nya deka bejurai sereta nyerenih manah agi pekara bekaul enggau belanja kelimpah isu bukai ke nyadi ba RTP begulai enggau ejensi ngaga projek.
“Terima kasih ngagai Opis Residen Pelilih Limbang enggau Opis Pelilih Limbang enggau Lawas ke udah ngatur Woksop RTP 2022 dua hari berunggu tu.
“Woksop tu deka nyadi awak alai berandau sereta nyerenih manah agi pekara bekaul lebih agi baka ungkus projek enggau isu ti bisi nyadi maya ngaga projek RTP.
“Aku andal ari woksop tu kitai deka lantang agi ngaduka projek RTP 2022 baka ke udah dilanggur ngelama tu,” pia ku iya maya dirandau udah ke bejadi Woksop RTP 2020 di Miri, kena Hari Tiga.
Paulus mega ngarapka ejensi ngaga projek semampai ulih bekerejasama enggau Palan Servis Batu Danau dikena nentuka tiap bengkah projek digaga enggau mujur.
Ba woksop nya, ejensi ke bisi datai diterangka enggau rintai projek RTP ke digaga nengah agih belanja ti diungkupka ngagai Kaban Parlimen enggau ADUN.
Kelimpah ari nya, penerang langgur projek ke deka digaga ba taun 2022 bela bisi dibantai. -EDISI UKAS
