ADUN Samariang Nyuaka Chek RM250,000 Ngagai Gerija St Paul Siol Kandis

HARI EMPAT, 14 OKTOBER 2021

KUCHING: Menteri Muda ba Opis Kepala Menteri (Undang-Undang, Kaul Perintah Nengeri enggau Perintah Besai enggau Matau Projek), Datuk Sharifah Hasidah Sayeed Aman Ghazali nyuaka check RM250,000 ngagai Gerija St Paul Siol Kandis, kena Hari Tiga.

Chek ari Unit Pekara Pengarap Bukai (UNIFOR) nya disuaka ngagai Mandal Chairman Gerija St Paul Siol Kandis, Geoffrey Mamat.

Iya ke mega Kaban Kunsil Nengeri (ADUN) Samariang madah, Perintah Sarawak semampai ransing ngungkupka bantu ngagai pengarap bukai di nengeri tu.

“Tu mandangka penyiru perintah kitai ti bela ngungkupka agih belanja ngagai gerija tauka rumah sembiayang ke bukai nengah UNIFOR.

“Perintah nengeri endang chakah ngetanka pengelikun kitai enda ngira bansa enggau jalai pengarap,” pia ku iya madah.

Berebak enggau nya, Datuk Sharifah madahka agih belanja dikena ngaga palan engkah kerita enggau ngemanahka perengka guna Gerija St. Paul Siol Kandis bela udah dikemendarka. -EDISI UKAS