TEGAS Enggau Shell Ngatur Program Sarawak Shell LiveWIRE

HARI EMPAT, 14 OKTOBER 2021

KUCHING: Turu Ekonomi Serakup Anak Sarawak (TEGAS) nengah TEGAS Digital Innovation Hub sekali agi bekerejasama enggau Shell ngatur program Sarawak Shell LiveWIRE nengah chara on-line kena 6 November nyentuk 5 Disember 2021.

Program nya ngembuan tuju bekunsika buah runding ngagai kompeni baru enggau pengawa dagang lalu nempa chara engkeman dikena napi peminta sosio-ekonomi maya tu.

Menteri Muda Pengatur Mengeri, Tanah enggau Rampa Menua ke mega Chairman TEGAS, Datu Len Talif Salleh madah, program nya mega bela ngembuan tuju deka nyaup orang dagang Sarawak ngemansangka pengawa sida.

“Penyereta program tu deka diterangka enggau pekara bekaul enggau dagang nengah chara woksop tauka ‘bootcamp’ enggau chara virtual.

“Tu dikena kitai nyaup nyungkakka penemu dagang, nguji model dagang lalu nyikap sida nyadi orang dagang ke ulih mantai sereta nyual penemu dagang nangkan ke tu ila,” pia ku iya madah penerang media, kena Hari Empat.

Datu Len madah, program nya dibuka ngagai orang dagang enggau inovator Sarawak ke beumur 18 taun ke atas.

“Lima iku penyereta ke dipilih ba hari kepenudi program deka nerima geran RM15,000 ari Shell enggau TEGAS.

“Kelimpah ari nya, sida mega deka diembing sereta disukung TEGAS enggau fasilitator Sarawak Shell LiveWARE nangkan program tu ila,” ku iya madah baru.

Penerang silik tau dipeda nengah https://bit.ly/sarawaklivewire2021 tauka e-mel ngagai accelerate@tegas.org.my. –EDISI UKAS