BKSS 7.0 Plus: RM3,000 Diberi ‘One-off’ Ngagai Dagang Mikro

HARI LIMA, 15 OKTOBER 2021

KUCHING: Dua iti agi bantu tambah deka diberi ngagai Industri Mit enggau Jelan Pemesai (SME) enggau Dagang Mikro ke berejister ba Gerempung Pengelikun Rama (PERKESO) naka 31 March 2021.

Kepala Menteri Sarawak, Datuk Patinggi Dr Abang Abdul Rahman Zohari Tun Datuk Abang Openg madah, bantu ke diberi nengah Bantu Khas Sarawakku Sayang (BKSS) 7.0 nya deka nyaup 24,600 iku orang dagang mikro di Sarawak.

“Bantu tu deka diberi sekali tauka ‘one-off’ enggau penyampau RM3,000 ngagai dagang nya,” pia ku iya madah.

Iya bejaku munyi nya ba Pengerami Ngelai Nyuaka BKSS 7.0 enggau Pengawa Mantaika BKSS 7.0 Plus Di Wisma Bapa Malaysia ditu, kena Hari Empat.

Kepala Menteri mega madah, bantu RM10,000 ke diberi ngagai Dagang Mit enggau Jelan Pemesai (SME) di Sarawak ti berejister ba PERKESO dilanjar ari 31 Disember 2020 ngagai 31 March 2021.

Iya ngarapka bantu nya tau bendar ngelempungka penanggul belanja ngagai orang dagang ngambika ulih neruska dagang sida maya tu.

Dulu ari nya, Kepala Menteri mega ngelai pengawa nyuaka bantu RM10,000 ngagai industri mit enggau jelan pemesai nengah Program BKSS 7.0. -EDISI UKAS