HARI DUA, 19 OKTOBER 2021

MIRI: Begunan Gerija BEM Jalai Airport Miri deka dikemanahka agi nengah Projek Transformasi Menua Pesisir (RTP) ADUN Piasau.

Menteri Muda Dagang Temuai, Seni enggau Main Asal ke mega Kaban Kunsil Nengeri (ADUN) Piasau Datuk Sebastian Ting Chiew Yew madah, projek nya deka bekenaka ungkus belanja RM100,000.

“Agih belanja tu datai ari Perintah Sarawak dikena nentuka pengelantang raban pengarap Kristian besembiang ba gerija nya,” pia ku iya madah udah ke ngabas gerija nya di Miri, kena Hari Satu.

Elder Gerija BEM Jalai Airport Miri, Henry Pengiran bela meri jaku terima kasih ngagai Perintah Sarawak lebih agi baka Unit Pekara Pengarap Bukai (UNIFOR) enggau Datuk Sebastian Ting ti ngelama tu mayuh nyaup ngaduka begunan gerija sida.

“UNIFOR udah meri bantu RM100,000 taun siti tadi ti dikena mayar jali ngaga projek ngemanahka begunan gerija lalu taun tu UNIFOR mega bisi nyuaka pemeri RM350,000 agi,” ku iya nerang.

Sehari nya mega, Datuk Sebastian Ting bisi ngabas taba Projek Ngemanahka Surau Nurul Hidayah, Kampung Haji Wahed ke deka digaga enggau ungkus RM50,000.

Kelimpah ari nya, iya bela ngabas Tadika Krokop ti bela deka dikemanahka. -EDISI UKAS