HARI SATU, 19 OKTOBER 2021

KUCHING: Opis Menteri Dagang, Seni enggau Main Asal Malaysia (MOTAC) ngungkupka agih belanja enggau insentif RM61 juta ngagai sida ke ngemeran pengawa dagang temuai ba selampur menua nyengkaum di Sarawak ti bepenanggul ketegal pandemik COVID-19.

Menteri ba Opis Menteri tu, Dato Sri Nancy Shukri madah, bantu nya diberi nengah program Strategik Memperkasa Rakyat Dan Ekonomi (PEMERKASA) 2021, Pemerkasa+ 2021, Pakej Perlindungan Rakyat Dan Pemulihan EkonomI (PEMULIH) 2021 enggau Geran Khas Prihatin 2021.

“Tu sebagi ari pengeransing perintah deka mulaika pemanah ekonomi dagang temuai sereta nyaup sida ti ngemeranka pengawa dagang temuai betapi enggau pandemik COVID-19,” pia ku iya madah.

Iya bejaku munyi nya ba aum media sepengudah Pengerami Nyuaka Bantu Wang Ngagai Orang Bejalaika Dagang Temuai di Kuching, lemai Hari Satu.

Kaban Parlimen Batang Sadong nya mega madah, 10 iku malin temuai, 10 ejensi dagang temuai, empat iku sida ke ngaduka Program Malaysia Rumah Keduaku (MM2h) enggau empat Program Nyemilik ti berejister enggau MOTAC nerima bantu entara RM500 ngagai RM3,000.

Ku iya, bantu nya diberi enggau chara berenggat kenyau ari pengelekai COVID-19 ditemu nyadi ba menua tu.

Kelimpah ari nya, MOTAC mega andal pemutus ulih bejalai ngagai nengeri bukai enda bepermit agi belabuh 11 Oktober tau bendar mulaika pemanah tikas dagang temuai, seni enggau main asal lalu negutka penatai pemisi menua. -EDISI UKAS