Sektor Betanam Betupi, Dagang Temuai Nyungkakka Pemansang Sri Aman: KM Sarawak

HARI EMPAT, 21 OKTOBER 2021

SRI AMAN: Sektor betanam betupi enggau dagang temuai patut dikemeratka Ejensi Pemansang Sri Aman (SADA) dikena ngemansangka agi sitak Sri Aman.

Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, Sri Aman mayuh tanah ke ulih dikemansangka enggau pengawa betanam betupi ti betikas besai.

Ku iya, baka di lubok Antu, Batang Ai enggau menua ke besemak mega tau bendar diangkat nyadi palan dagang temuai ke tau bendar nyungkakka penatai pemisi peranak menua nya.

“Ba penemu aku, SADA patut ngemeratka dua bengkah sektor ke ulih nyediaka gawa gawa enggau nyungkakka penatai pemisi.

“Keterubah iya nya sektor betanam betupi laban kitai bisi tanah mayuh. Kitai deka muka endur betanam betupi enggau tikas ke besai.

“Kitai mega bisi Batang Ai, Lubuk Antu enggau menua ke besemak ti tau dikemansangka agi enggau pengawa dagang temuai,” pia ku iya madah maya Pengerami Bejadika Ejensi Pemansang Sri Aman (SADA) di Sri Aman, kena Hari Empat.

Iya mega madah, penumbuh SADA deka nyadika pelasar ngempung semua langgur pemansang di Sri Aman.

Ku iya, SADA udah diungkupka agih belanja dikena ngemujurka semua perambu pemansang ba sitak nya.

Kepala Menteri mega madah, pengawa ngemansangka sitak nya deka dikemujurka enggau pemansang baka Jalai Pan Borneo, jalai nebing sungai enggau Jematan Batang Lupar.

Dulu ari nya Chairperson SADA Dato Sri Rohani Abdul Karim ba jaku iya madahka SADA udah ngelanggur pelin pemansang bepelasarka pengelantang rayat sereta ekonomi ke tegut.

Iya madah, pemansang infrastruktur deka dikemeratka agi enggau pengawa nyambung jalai ngagai endur ke mar dilawa dikena ngerandang awak baru ungkup pemansang sitak Sri Aman.

“SADA udah ngemendarka 48 bengkah langgur projek pemansang nengah belanja ari ‘Alternative Fundings’,” ku iya madah.

Berebak enggau pejalai iya ke Sri Aman, Kepala Menteri mega bisi ngabas projek ngaga Sepital Sri Aman baru ke diatu udah datai ba renggat kedua.

Projek ke beungkus RM181,476,154.45 nya diatu udah digaga naka 96 peratus lalu dipelabaka tembu 29 Disember 2021.

Sepital baru nya ila deka disikap enggau 108 iti katil baka ba Wad Orang Indu, Wad Lelaki, Wad Nembiak Mit, Wad Obsterik, Tiga Palan Beputung, ICU, Unit Emergency, Klinik Lutor Pakar, 14 Mesin Hemodialysis, Makmal Patologi sereta perengka guna ke bukai.

Kelimpah ari nya, Kepala Menteri mega dipebasa bejadika Pengerami Nasih Tanah Projek Peace Park, Sri Aman, taman rekreasyen besemak enggau Rumah Sri Aman.

Ba pengawa tu, iya dulu agi diterangka Direktor Besai Opis Pemansang Enggau Nyaga Tanah (LCDA) Monaliza Zaidel bekaul enggau projek nya ke diperambu tembu Mei 2022.

Projek nya deka digagaka enggau Heritage Trail, Jungle Trail, Scenic Bridge, Peace Pond, Malay Pavilion, Chinese Pavilion, Dayak Pavilion, Playground, Footpath, Reflexology, Exercise Yard, Peace Square kelimpah palan engkah kerita enggau motosikal.

Sama bela datai, Menteri Pengawa Berumah enggau Perintah Menua, Dato Sri Dr. Sim Kui Hian, Sekretari Perintah Sarawak, Datuk Amar Jaul Samion, Menteri Muda Pengelantang Komuniti, Datuk Francis Harden Hollis, Menteri Muda Pemansang Industri, Datuk Dr Malcom Mussen Lamoh, Menteri Raban Nembiak enggau Lumba, Datuk Snowdan Lawan sereta bala temuai ke dipebasa ke bukai. -EDISI UKAS